तुझी आठवण-२

चुकलेल्या वाटांवर पावलांचे ठसे जेव्हा दिसतील

तेव्हा
तुझी आठवण येईल

आभाळ भरेल.... कोसळेल...
थेंबानी त्या पाउलखुणाही पुसट होतील

आता तुझी आठवण येईल

भरलेल्या आभाळाखाली माडांच्या धूसर,
भयाण सावल्या.....
आणि वाऱ्याची संथ कुजबूज
बाकी सगळ शांत होईल

तेव्हा तुझी आठवण येईल

अर्धी वाट चाललीस
आता चाललेली एकटी वाट पुन्हा चालत हरुन जाईल

तेव्हा तुझी आठवण येईल

तुला शोधणाऱ्या माझ्या डोळ्यांसारखे ते पक्षी
उगाच आभाळभर फिरत राहतील

आता तुझी आठवण येईल
पुन्हा मन भरून येईल
आणि.......
तुझी आठवण येईल

तिची कविता- १

तुझ्या डोळ्यांमधली बाहुली मी अजुन जपलीये
तुझ्या हसण्याचीही सावली मी अजुन जपलीये

थोडे थोडे शब्द तुझे जणू भरलं आभाळ
एकच तेवढी बेभान सर मी उरात जपलीये

तुझ्या डोळ्यांमधली बाहुली मी अजुन जपलीये...

एकटं एकटं माझं चालणं एकटं केव्हाचं संपलय
मझ्यासोबत तुझं चालणं मी इतकं जपलंय

तुझ्या डोळ्यांमधली बाहुली मी अजुन जपलीये...

खुप जपलंय मी उराशी तुझ्या आठवांचं अंगण
त्यावर पैंजणांचा सडा आणि रंगांचे सर

तुझ्या डोळ्यांमधली बाहुली मी अजुन जपलीये...

एक वेदनांची कडा माझ्या हसण्याला जणू
माझ्या डोळ्यांचही काही कुठे कुठेसं चुकलंय

तुझ्या डोळ्यांमधली बाहुली मी अजुन जपलीये...

माझ्या सावळया देहात फक्त स्पर्श तुझा उरे
तुझं भिजलेलं गोकुळ मी हसतंच सोडलंय

तुझ्या डोळ्यांमधली बाहुली मी अजुन जपलीये...

उगाच माझे शब्दं श्वास नुरल्यासारखे
त्याचं तेवढं शल्य या कवितेत लपलंय

तुझ्या डोळ्यांमधली बाहुली मी अजुन जपलीये
तुझ्या हसण्याचीही सावली मी अजुन जपलीये

सायली

सांग सये सांग तुझ्या डोळ्यांत दिसतं काय गं?
सांग सये सांग तुझ्या ओठांत हसतं काय गं?

सांग सये मुल तुझ्यात इतकं अल्लड कसं काय?
सांग सये मन कसं दुधावरची स्निग्ध साय?

सांग सये प्रेम तुझं इतकं कसं निखळ गं?
तुझं माझं नातं हळवं इतकं वेल्हाळ कसं काय?

खरं सांग फुल कुठलं पाखरु होऊन घेऊन येतेस
सुखात दुखाःत सहज हसत
रंगीत माझी सावली होतेस

कळी होतेस ओंजळीत कधी
वेलींवरची पालवी होतेस
अलगद माझ्या डोळ्यांना
बिलगुन माझी नीज होतेस

पाऊल पाऊल नाजुक टाकत
भल्या पहाटे पैंजण होतेस
चंद्रवेड्या चांदणरात्री
माझ्यापुरतं अंगण होतेस

सोनसळी संध्याकाळी
माझी सांजवात तू
रानांमधून हळूच किलबिल
माझ्यासाठी गात तू

पावसामधून चिंब ओलं
कंच हिरवं रान तू
आयुष्यातल्या गाण्यात माझ्या
सगळ्यांत सुंदर तान तू

स्वप्नात माझ्या तुझ्यासारखीच
तूच खरं! सावली काय
स्वप्नं माझं तुझ्याइतकंच
तुझ्यासारखं सुंदर काय?

डोळ्यांत तुझं पहिलं हसू
आणि श्रावणसर गं
तुझी मिठी निघता निघता
माझं इवलं घर गं

आठवशील तू कधी जेव्हा
हसणं तुझं पुन्हा बघेन
सगळं हरवून तुझ्याजवळ
दोन क्षण पुन्हा जगेन